१०० वे अखिल भारतीय मराठी नाट्य
संमेलन - पिंपरी चिंचवड २०२४

स्मरुया इतिहास वैभवशाली शतकाचा, पायाभरणी करूया भविष्यातील प्रवासाचा
अखिल भारतीय मराठी नाट्य संमेलन ही एक चळवळ आहे. या चळवळीला शंभर वर्षांची अतिशय गौरवास्पद अशी परंपरा आहे. या संमेलनामुळे नाट्य कलाकारांना एक नवी ऊर्जा, नवचैतन्य मिळते तर नाट्य रसिकांमध्येही एक नवा उत्साह संचारतो. बालगंधर्व, अण्णासाहेब किर्लोस्कर, गोविंद बल्लाळ देवल, कृष्णाजी प्रभाजी खाडीलकर, पुरुषोत्तम दारवेकर अशा दिग्गजांनी अजरामर केलेला मराठी नाट्य क्षेत्राचा वैभवशाली इतिहास स्मरण्याची आता वेळ आली आहे. चला शतक महोत्सवी नाट्यसंमेलनात सामील होऊन नव्या जुन्या उत्तमोत्तम नाटकांचा आनंद लुटुयात.

शतकमहोत्सवी नाट्य संमेलन - मुहूर्तमेढ एका प्रेरणापर्वाची
१०० वे अखिल भारतीय मराठी नाट्यसंमेलन हा नाट्य क्षेत्रातील एक अतिशय महत्त्वाचा टप्पा आहे. प्रदीर्घ अन वैभवशाली परंपरा लाभलेल्या मराठी नाटकांच्या प्रवासातील हा एक ऐतिहासिक सोहळा आहे. विशेषतः मराठी नाट्यसंमेलनाच्या आजवरच्या इतिहासातील हा एक मैलाचा दगड म्हणून गणला जाईल. वर्तमान परिस्थितीत उल्लेखनीय कामगिरी करीत असलेल्या नाट्यकर्मींना यामुळे निश्चितच चालना मिळेल. शिवाय पुढील वाटचालीचा आराखडाही निश्चित केला जाईल. म्हणूनच हे नाट्यसंमेलन भविष्यातील एका प्रेरणपर्वाची मुहूर्तमेढ रोवेल आणि अखिल भारतीय मराठी नाट्यसृष्टीला एक नवसंजीवनी बहाल करेल.